Boro geus atoh, sugan teh Raja Arab datangna ka Bali rek mayar jalma anu katinggang kere di Masjidil Harom, lain ngan saukur liburan, nempo tari kecak jeung tari barong. Lapur deui atuh eta anu jadi kurban, teu tulus ngarawu duit milyaran.
“ Ambuing, Ujang, Raja Arab mah Tawaddu, teu kudu hariwang, engke oge mayar,” ceuk Lurah Semar ka Si Dewala.
“ Nyaho lah,” tembal Si Dewala.
“ Nyaho naon, karah, Ujang ?” ceuk Lurah Semar deui.
“ Tara Mawa Duit, “ tembal Si Dewala.
Kombayana nyampeurkeun.
“ Lapur Ama ge,” ceuk Kombayana.
“ Har, na lapur kumaha, Ama ?” ceuk Si Dewala.
“ Tadina mah Ama rek nipu, suku Ama rengkod jeung leungeun kengkong  rek ngaku katinggang kere. Sugan we percayaeun,” ceuk Kombayana.
“ Datangan we anak buahna, biasana mah sok aya di Puncak atawa di Cipanas ngalontrak vila,” ceuk Si Dewala.
“ Kutan,” ceuk Kombayana bari nyampeurkeun ka Si cepot. Sigana wae, Ama Kombayana ngajak Si Cepot nganteur ka Vila Green Aple di Cipanas.
“ Lamun hayang panggih, kudu make dangdanan awewe, jeung ulah kaciri beungeut, iwal ti panon wungkul,” ceuk Si Cepot.
Kulantaran hayang duit badag tea, Ama Kombayana nurut sakumaha pituduh Si Cepot. Manehna make dangdanan Putri India  kalayan baruni pisan.
Barang nepi ka gerbang komplek Vila Green Aple, barudak ngora nyalampeurkeun.
“ Harim, Kang, parawan atawa randa ?” ceuk Jang Abep, salah saurang barudak tea.
“ Teu apal da can ngajaran, pokokna mah, yahut binnikmah,” ceuk Si Cepot bari ngacungkeun jempolna.
“ Tilu sasiheun, sabaraha Kang ?” ceuk Jang Abep.
Ngadenge aya anu nawar, Kombayana atoheun, sigana wae, Arab teh rek mayar ganti rugi kere tea.
“ Tilu milyar leuwih,” ceuk Kombayana ngawarewos ka Si Cepot. Si Cepot neu nolih ka Kombayana.
“ Biasana sabaraha ?” ceuk Si Cepot ka Jang Abeb.
“ Mas kawina sapuluh juta, ipekahna sabulan tilu juta, bayar dimuka, saupami tuan Arabna cocok,” ceuk Jang Abep.
“ Okeh,” ceuk Si Cepot.
Jang Abep ngagiringkeun Si Cepot jeung Kombayana anu nyaru Putri India ka hiji vila di Green Aple.
Tuan Arab keur andekak we dina korsi hareupeun vila siga anu keur nungguan pisan Jang Abep.
“ Ahlan wasahlan, Harim ladiid binnikmah,” ceuk Jang Abep.
Tuan Arab ngahariring lagu Aril Peterpan bari nyampeurkeun Kombayana.
“ Buka dulu topengmu, kan kulihat wajahmu ,” cenah.
“ Laa, pulus aidon, pulus aidon, pulus maaniii,” ceuk Si Cepot.
Tuan Arab muka dompet, sababaraha lambar dibikeun ka Si Cepot.
“ Halal, halal, “ ceuk Si Cepot bari indit ninggalkeun Kombayana.
Kombayana rungah-ringeuh. Manehna ngudag Si Cepot. Pakean Putri Indiana ucutan.
“ Pot, tungguan Ama,” ceuk Kombayana.
Si Cepot lumpat. Ama Kombayana ngudag bari atug-atugan.
Tuan Arab tutunjuk bari nyarekan Jang Abep.
“ Harom…., harom…. musahil..mustahil ,,,,ente tipu ana,” ceuk Tuan Arab.
Jang Abep ngadegdeg bangun anu sieuneun kaleungitan pacabakanana, nyalo harim keur Tuan Arab. *)